हेल्थ टिभी अनलाइन : आजदेखि सरकारले सात वटा जिल्लामा हात्तिपाइले रोग विरुद्धको औषधि खुवाउँदैछ । सात जिल्लाका ५० लाख ७८ हजार जनालाई हात्तिपाइले रोग विरुद्धको औषधि खुवाउन लागिएको हो ।

झापा, धनुषा, महोतरी, सर्लाही,रौतहट, रसुवा र कपिलवस्तुमा हात्तिपाइले विरुद्धको औषधि खुवाइने इपिडिमियोलोजी तथा रोग नियन्त्रण महाशाखाका निर्देशक डा रुद्र मरासिनीले बताए। हालसम्म ५३ जिल्लामा हात्तिपाइले रोग विरुद्धको आम औषधि सेवन कार्यक्रम सफल भइसकेको र १३ जिल्ला रोगमुक्त भइसकेको पनि उनले जानकारी दिए ।

उनले अहिले औषधि खुवाउन लागिएका सात जिल्लामा भने यसअघि चलाइएका अभियान सफल नभएको कारणले पुन औषधि खुवाउन लागिएको बताए ।

हात्तिपाइले विरुद्ध खुवाइने तीन प्रकारका औषधि पूर्ण रुपमा सुरक्षित रहेको र धेरै देशहरुले प्रयोग गर्दै आइरहेको भन्दै औषधि सेवन गरेर यो रोगबाट बच्न स्वास्थ्य सेवा विभागकी महानिर्देशक डा संगीता मिश्राले सबैलाई आग्रह गरेकी छिन् ।