हेल्थ टिभी अनलाइन\ काठमाडौं : काठमाडौं महानगरपालिकाले सबै वडाहरुमा डेंगु फैलाउने लामखुट्टेको लार्भा नस्ट गर्ने कार्यक्रम सञ्चालन गरिरहेको छ ।

डेंगुको संक्रमणबाट हुन सक्ने महामारी रोकथाम र नियन्त्रणका लागि काठमाडौँ महानगरपालिकाले सबै वडामा एकै पटक लार्भा नष्ट गर्नेसहित सचेतना अभियानलाई तीब्र बनाएको हो । यस क्रममा बुधबार वडा वडामा पानी जमेका ठाउँमा लार्भा नष्ट गर्ने, सर्वसाधारणलाई रोगका विषयमा जानकारी दिने, सरसफाइ गर्ने, सफा गरिएको ठाउँमा चुना छर्किने क्रियाकलाप गरिएको थियो । यस क्रममा वडा वडामा लार्भा नष्ट गर्ने, सर्वसाधारणलाई रोगका विषयमा जानकारी दिने, सरसफाइ गर्ने, सफा गरिएको ठाउँमा चुना छर्किने क्रियाकलाप भइरहेको छ । माइकिङ् गरेर रोगका विषयमा जानकारी दिँदै, रोग नियन्त्रणका लागि नागरिकको सहभागिताका लागि अनुरोध गरिँदै छ । वडाको अगुवाईमा चलेको कार्यक्रममा जनप्रतिनिधि, कर्मचारी, स्वास्थ्यकर्मी, महिला स्वयमसेविकासहित स्थानीयहरु सहभागी भइरहेका छन् ।

यसका अतिरिक्त महानगरले डेंगु रोगको बारेमा टेलिफोनमार्फत परामर्श दिन रोगका लक्षण, उपचार, सावधानी हटलाइन ११८० लाई २४ सै घण्टा सञ्चालनमा ल्याएको छ । अस्पताल जानु परे १०२ नम्बर सम्पर्क गरेर निःशुल्क एम्बुलेन्स प्रयोग गर्न सकिने प्रबन्ध मिलाइएको छ । रोगको उपचारका लागि चाहिने सिटामोल, जीवन जल लगायत आवश्यक औषधिहरु स्वास्थ्य प्रवर्धन केन्द्रमा पर्याप्त उपलब्ध गराएको पनि महानगरले जनाएको छ ।