हेल्थ टिभी अनलाइन \काठमाडौं : ग्रान्डी इन्टरनेशनल अस्पतालमा सुविधासम्पन्न आइसीयू स्थापना भएको १० वर्ष पुगेको छ । यो १० वर्षमा ७ हजार बढी बिरामीले सेवा लिएको अस्पतालका अध्यक्ष दिपक । कुँवरले बताए । आइसीयू स्थापनाको १० औं वार्षिकोत्सवको अवसरमा आयोजित कार्यक्रममा अध्यक्ष । कुँवरले ग्रान्डी अस्पतालले बिरामीको आवश्यकतालाई मध्यनजर गर्दै धेरै जनाको सहयोग र साथबाट आइसीयू स्थापना गर्न सकिएको बताए ।

कार्यक्रममा ग्रान्डी अस्पतालका मेडिकल डाइरेक्टर डा बिनोद विजुक्छेले सुरुमा आइसीयू बेड नपाएकै कारण बिरामीको मृत्यु भएको प्रसंग उठाउँदै आफनो अस्पतालले यो नभइ नहुने सेवा तुरुन्त सुरु गर्नुपर्छ भनेर सुरु गरिएको बताए ।

उनले आइसीयू भएपछि धेरै जटिल बिरामीको शल्यक्रिया गर्दा पनि ढुक्क हुन सकेको जिकीर गरे । उनले चुस्त दूरुस्त आइसीयू सेवाका कारण बिरामीको मृत्युदर पनि कम भएको बताए ।

अस्पतालका आइसीयू कन्सल्टेन्ट डा सुशिल खनालले ग्रान्डीमा यो १० वर्षमा ७ हजार १५६ जनाले आइसीयूको सेवा लिएको । ती मध्ये मृत्यु दर १४ प्रतिशत मात्र रहेको बताए । उनले विश्वभरीको तथ्यांक हेर्दा यो मृत्युदर निकै कम भएको समेत जिकीर गरे ।

यसैगरी कार्यक्रममा अस्पतालका आइसीयू विभागका प्रमुख प्राडा सुवास प्रसाद आचार्यले ग्रान्डी अस्पतालले आइसीयू सेवालाई स्थापित गर्ने मात्र नभएर यसको विकास र विस्तारका लागि यहींबाट क्रिटिकल केयरका नर्सहरुलाई विभिन्न किसिमका तालिमहरु दिएर उनीहरुलाई दक्ष बनाउने काम समेत गरेको बताए । उनले क्रिटिकल केयरमा विभिन्न फेलोसिप कार्यक्रमहरु पनि संचालन भइरहेको जनाए ।

ग्रान्डी अस्पतालमा ३० वटा आइसीयू बेड रहेको छ । कोभिड कालमा ७४३ जना कोरोना संक्रमितको आइसीयूमा राखेर उपचार गरिएको अस्पतालले जनाएको छ । कार्यक्रममा आइसीयू सेवामा विशेष योगदान पुर्याउने व्यक्तिहरुलाई सम्मान गरिएको थियो ।