रोल्पा : बिरामीका लागि तत्काल रक्त सेवा उपलब्ध गराउने उद्देश्यले जिल्लामा ‘ब्लड फर रोल्पा’ मोबाइल अप्लिकेशनको सुरुवात गरिएको छ।

रोल्पाका आठ युवाको सक्रियतामा ‘ब्लड फर मोबाइल एप’ शुरु गरिएको हो। जिल्लामा ब्लड बैंक नहुँदा अप्रेसनको समयमा चाहिने रगत खोज्न निकै सकस हुने देखेर आफूहरूले युवाको सामाजिक दायित्व सम्झेर अभियान थालनी गरेको अभियन्ता विनोद डाँगीले बताए।

आकस्मिक रूपमा रगतको आवश्यक परे यो मोबाइल एपमा रहेका व्यक्तिको सम्पर्क नम्बरबाट थप जानकारी लिन सकिन्छ। हालसम्म आकस्मिक रक्तदान गर्न इच्छुक ५० जनाको विवरण एप्समा राखिएको जनाइएकाे छ। एन्ड्रोइड मोबाइलमा यो एप्स डाउनलोड गरी आफूलाई आवश्यक परेको खण्डमा रगत दिन चाहने व्यक्तिलाई आफैँले फोन गरी तुरुन्त बोलाउन सकिने डाँगीले जानकारी दिए। हालसम्म उक्त एप्समा रहेका छ जनाले रक्तदान गरिसकेको बताइएको छ ।

महिला स्वास्थ्य कार्यक्रमअन्तर्गत डेलीभरी पूर्व रगत व्यवस्थापन गर्नुपर्ने भएकाले आफूहरूले सधैँ यसको सकस भोग्दै आएकाेमा ‘मोबाइल एप्लिकेसन’ अाएपछि राहत भएको जिल्ला स्वास्थ्य कार्यालय रोल्पाका मेडिकल सुपरीटेन्डेन्ट प्रकाश बुढाले बताए।