बैतडी : जिल्लामा मौसमी ज्वरोका बिरामीको संख्या बढेको छ। दूषित पानीका कारण जिल्ला अस्पतालमा हाल दैनिक एक सय बिरामी आउने गरेका छन्।

उपचारका लागि आउनेमध्ये धेरैजसो ज्वरोका बिरामी भएको जिल्ला जनस्वास्थ्य कार्यालयका प्रमुख डा.जगदीशचन्द्र विष्टले जानकारी दिए। ९० प्रतिशत बिरामीमा सफा पानी सेवन नगर्नाले समस्या देखिएको उनले बताए।

यता समयमा खरिद प्रक्रिया अघि नबढाइँदा जिल्लाभर औषधि अभाव भएको छ। जिल्लाका सबै स्वास्थ्य संस्था स्थानीय तहमा हस्तान्तरण भएपछि औषधि अभाव भएको हो। धेरैजसो स्वास्थ्य संस्थामा औषधि अभाव भएको सम्बन्धित स्वास्थ्य संस्थाले जनाएका छन्।

तल्लो स्वराड क्षेत्रका शिवनाथ गाउँपालिका र पञ्चेश्वर गाउँपालिकाका स्वास्थ्य संस्थामा पनि औषधि अभाव रहेको केशरपुर प्राथमिक स्वास्थ्य केन्द्र मेलौलीका स्वास्थ्य सहायक मुकेश दयालले जानकारी दिए।

त्रैमासिक रूपमा आउने औषधि पछिल्लो समयमा नआएकाले स्वास्थ्य संस्थामा औषधि अभाव चुलिएको डिलाशैनी गाउँपालिकाका स्वास्थ्य संयोजक रामसिंह खत्रीले बताए।

जिल्ला अस्पतालमा पनि पर्याप्त मात्रामा औषधि नभएको जिल्ला जनस्वास्थ्य कार्यालयका प्रमुख विष्टले जानकारी दिए। औषधि खरिद प्रक्रिया समयमा शुरु नहुँदा औषधि अभाव हुने गरेको उनले बताए।