काठमाडौं : थापाथलीस्थित परोपकार प्रसूति तथा स्त्रीरोग अस्पतालले ललितपुरको भैँसेपाटीमा ‘स्याटेलाइट क्लिनिक’ सञ्चालनमा ल्याएको छ।

ललितपुर जिल्लाका सेवाग्राहीलाई लक्षित गर्दै अस्पतालले भैँसेपाटीमा स्याटेलाइट क्लिनिक सञ्चालनमा ल्याएको हो। परोपकार प्रसूति तथा स्त्रीरोग अस्पताल थापाथलीका निर्देशक डा. जागेश्वर गौतमले देशकै एक मात्र महिला तथा प्रसूतिसम्बन्धी सरकारी अस्पतालमा बिरामीको चाप व्यवस्थापन गर्न स्याटेलाइट क्लिनिक शुरु गरिएको जानकारी दिए।

ओपीडी सेवा मात्र सञ्चालन हुने क्लिनिकमा दैनिक ५० जनासम्मले सेवा लिने गरेका छन्।

अस्पतालका अनुसार स्याटेलाइट क्लिनिकमा स्त्री तथा प्रसूति, बालरोग, रेडियोलोजी सेवा, अल्ट्रासाउण्ड, ल्याब परीक्षण लगायत सुविधा छन् । क्लिनिकमा चिकित्सक, नर्स, ल्याब टेक्निसिएन लगायत १० स्वास्थ्यकर्मीले उपचार सेवा दिइरहेको गाैतमले बताए।