झापा : आयुर्वेद स्वास्थ्य संस्थामा उपचार गराउनेको सङ्ख्या बढेको छ। विशेषगरी नसर्ने रोगका बिरामी आयुर्वेद उपचार पद्धतिप्रति आकर्षित भएका हुन्।

आव २०७४\७५ मा ४१ हजार ४५ बिरामीले आयुर्वेद स्वास्थ्य संस्थाबाट सेवा लिएका छन्। आव २०७३\७४ मा ३० हजार ४८२ जनाले मात्र सेवा लिएका थिए।

जिल्लाका सात आयुर्वेद औषधालयले बिरामीलाई सेवा उपलब्ध गराउँदै आएको जिल्ला आयुर्वेद स्वास्थ्य केन्द्रका प्रमुख डा. केनिन राईले बताए।

गत आवदेखि पञ्चकर्म, क्षारसूत्र, फिजियोथेरापी, अकुपञ्चर सेवा प्रदान गरिँदै आएको छ। उच्च रक्तचाप, मधुमेह, श्वासप्रश्वास, मुटुरोग, मिर्गौला रोगीलगायतले आयुर्वेद स्वास्थ्य संस्थामा उपचार गराउँदै आएका छन्।