धनकुटा : जिल्ला अस्पताल चिकित्सकविहीन भएको छ। अस्पतालका मेडिकल सुपरिटेण्डेनसहित दुई डाक्टरको एकैपटक सरुवा  र करारमा रहेका तीन डाक्टरको पनि म्याद सकिएपछि अस्पताल चार दिनदेखि चिकित्सकविहीन भएकाे प्रशासन सहायक वीरेन्द्रकुमार श्रेष्ठले बताए।

मेडिकल सुपरिटेण्डेन डा. फणिन्द्र बराल र डा. प्रीति यादव सरुवा भएर अन्यत्र गइसकेका छन्। करारमा रहेका हेमसागर गौतम, बबिन रेग्मी र सुमन जायसवालको करार अवधि समाप्त भएपछि जिल्ला अस्पताल चिकित्सकविहीन बनेको हो।  दरबन्दीमा डा. नीति प्रसाईँ र नीलम कुमारीलाई पठाइएको भनिए उनीहरू अस्पतालमा हाजिर  भइनसकेकाे अस्पताल प्रशासन जनाएको छ।

अस्पताल डाक्टरविहीन भएपछि धनकुटासहित तेह्रथुम, संखुवासभा र भोजपुरबाट उपचारका लागि आएका सेवाग्राही अन्यत्र धाउन बाध्य भएका छन्।