१७ साउन २०७५ , बिहिबार

कर्मचारी अभावमा उपचार सेवा प्रभावित

दाङ : लमही अस्पतालमा कर्मचारी नहुँदा सेवा प्रभावित भएको छ। करारमा रहेका कर्मचारीको म्याद असार मसान्तदेखि थप नभएपछि सेवा सञ्चालनमा समस्या भएको हो।

इमरजेन्सीका दुई, प्यारामेडिकलका दुई, एम्बुलेन्स चालक एक, शववाहन चालक एक र कार्यालय सहयोगी तीन जनाको म्याद थप नभएपछि समस्या भएको अस्पतालका मेडिकल सुपेरिटेण्डेण्ट डा.विमलेश गुप्ताले बताए।

राजमार्ग नजिकको अस्पताल भएकाले बिरामीको चाप अत्यधिक रहेको तर जनशक्ति पर्याप्त नभएको उनले बताए। ‘दैनिक ६० देखि एक सयसम्म बिरामी उपचारका लागि आउँछन्’, उनले भने, ‘दैनिक ८\१० जना दुर्घटनाका घाइते आइरहेका हुन्छन्।’

१५ शय्याको लमही अस्पतालमा हाल तीन जना डाक्टरको दरबन्दी छ। अस्पतालमा हाल अहेब ५, नर्स एक, अनमी ५ र कार्यालय सहयोगी दुई जना कार्यरत छन् । अझै १०\१२ जना कर्मचारी आवश्यक रहेकाे गुप्ताले बताए।

हेल्थ टिभी अनलाइन

हेल्थ टिभी अनलाइन स्वास्थ्य विधामा नेपाली पत्रकारिता इतिहासकै पहिलो श्रव्यदृश्य केन्द्रित मल्टी मिडिया अनलाइन पोर्टल हो। जनस्वास्थ्य समस्या, रोग र उपचार, चिकित्सा विज्ञान र शिक्षा, आयुर्वेद, स्वास्थ्य प्रविधि, प्राकृतिक चिकित्सा, जीवनशैलीलगायतका सवालमा समाचार, टिप्पणी, विचार, विज्ञको राय, अन्तरवार्ता, छलफल र संवादमार्फत विश्वव्यापी रूपमै पाठक, श्रोता र दर्शकलाई सचेत गराउने कार्यमा हेल्थ टिभी अनलाइन कटिबद्ध छ।