हेल्थ टिभी अनलाइन : नेपाल क्यान्सर अस्पतालमा इन्टरनेशनल चाइल्डहुड क्यान्सर डे मनाइएको छ । अस्पतालले क्यान्सर जितेका स साना बालबालिकासँगै यो दिवस मनाएको हो ।

कार्यक्रममा बालबालिका र उनीहरुको अभिभावकको उपस्थिती रहेको थियो । कार्यक्रममा बोल्दै अस्पतालका अध्यक्ष डा सुदिप श्रेष्ठले बालबालिकाको क्यान्सर समयमै उपचार गरेमा पूर्ण रुपमा निको हुने बताए ।

यसैगरी बाल क्यान्सर रोग विशेषज्ञ डा अन्जली पण्डितले बालबालिकाको क्यान्सरबारे अभिभावक बढी सचेत हुनपर्ने र केही असामान्य जस्ता देखिने लक्षणप्रति सचेत हुनपर्नेमा जोड दिइन । उनले बालबालिकालाई बारम्बार ज्वरो आउने, शरीरमा निलो रातो धब्बा देखिने, जोर्नीहरु दुखिरहने जस्ता लक्षण देखिएमा तुरुन्त डाक्टरलाई परामर्श लिन सुझाव दिइन । कार्यक्रममा बालबालिकाहरुले आ आफनो प्रतिभा समेत देखाएका थिए ।

कार्यक्रममा नेपाल क्यान्सर सपोर्ट ग्रुप र उपचारका लागि सहयोगी हातहरुको पनि सहकार्य रहेको थियो ।