हेल्थ टिभी अनलाइन \काठमाडौं : सर्वोच्च अदालतले आठ वर्ष पछि नागरिकको स्वास्थ्यसँग सिधै जोडिएको विषयको पक्षमा फैसला गरेको छ । सर्वोच्च अदालतले सुर्तीजन्य पदार्थ नियन्त्रण तथा नियमन गर्ने संसोधित निर्देशिका पूर्ण रुपमा कार्यन्वयन गर्न परमादेश दिएको हो । योसँगै नेपालमा अब सबै खालका सुर्तीजन्य पदार्थको बट्टामा अनिवार्य रुपमा ९० प्रतिशत चेतावनीमूलक चित्र छाप्नुपर्नेछ ।

स्वास्थ्य तथा जनसंख्या मन्त्रालयले २०६८ मा सुर्तीजन्य पदार्थ नियन्त्रण तथा नियमन गर्ने ऐन जारी गरेको थियो भने २०७१ कार्तिकमा सुर्तीजन्य पदार्थ नियन्त्रण तथा नियमन गर्ने निर्देशिकालाई संसोधन गरेको थियो ।

सुर्ती उद्योगीहरुले भने यो कानून आफूहरुलाई मान्य नहुने भन्दै निर्देशिका खारेज गरिनुपर्ने माग गर्दै सर्वोच्चमा रिट दायर गरेका थिए । त्यसपछि उनीहरुका विरुद्धमा अधिवक्ता हुतराज कोइराला र एक्सन नेपालका तर्फबाट अधिवक्ता रामचन्द्र शर्माले रिट दायर गरेका थिए । रिट परेपछि सर्वोच्चमा पटकपटक पेशी बोलाइएपनि फैसला हुन सकेको थिएन । तर आइतबार अन्तत जनस्वास्थ्यका पक्षमा फैसला भएको छ ।

सर्वोच्चको यो परमादेशसँगै अब नेपालमा सबै खालका सुर्तीजन्य पदार्थमा यसबाट हुने हानीकाबारेमा चेतावनीमूलक चित्रसहितको सन्देश छाप्नैपर्ने हुनेछ । यसको अटेरी गर्ने नेपालको सबैभन्दा ठूलो सुर्ती उद्योग सुर्य नेपाल हो । यो फैसलासँगै अब उक्त कम्पनीले पनि कानून बमोजिमको चित्र छाप्नैपर्ने हुन्छ । अहिलेसम्म अटेरी गर्दै आएको सुर्य नेपाललाई यो परमादेशले ठूलै झट्का दिएको छ । त्यसो त सुर्ती उद्योगको तर्फबाट परफेक्ट ब्लेन्डसले मुद्धा हालेको भए पनि उसले भने ९० प्रतिशत चित्र छापिसकेको छ । चित्र नछापेर अटेरी गर्ने सूर्य नेपाल मात्र थियो र अब सो पनि यो आदेशपछि बाध्य हुनेछ ।

आइतबार न्यायाधीशद्धय कुमार रेग्मी र डा मनोज कुमार शर्माको इजलासले परफेक्ट ब्लेन्डसको तर्फबाट दायर रिट खारेज गरेको हो ।