हेल्थ टिभी अनलाइन\ काठमाडौं : काठमाडौंको थापाथलीमा रहेको नर्भिक अस्पतालले अवैध रुपमा बनाएको टहरा तथा संरचना भत्काउन अटेरी गरेको छ ।

काठमाडौं महानगरपालिकाका मेयर बालेन्द्र शाह सोमबार आफै नर्भिक अस्पताल पुगेर अवैध रुपमा बनेका संरचना २४ घण्टाभित्र भत्काउन अल्टिमेटम दिएर आएका थिए । तर आज अस्पतालका अध्यक्ष राजेन्द्र बहादुर सिंहले सो संरचनामा अक्सिजन प्लान्ट, विद्युत वितरण प्यानल, खानेपानी र डायलाइसिस जस्ता बिरामीको आवश्यक उपकरण रहेकाले तत्कालै भत्काउन सम्भव नभएको भन्दै महानगरलाई पत्र पठाएको बताएका छन्।

नर्भिक अस्पतालले वर्षौदेखि सरकारी जग्गा अतिक्रमण गरेर झण्डै डेढ रोपनी जग्गामा अस्पतालका लागि चाहिने संरचना बिना अनुमति बनाएको पाइएपछि महानगरले सो संरचना तत्काल भत्काउन निर्देशन दिएको हो ।

अस्पतालले लाखौं भाडा तिर्नुपर्ने भए पनि अत्यन्त सस्तोमा सो सरकारी जग्गा भाडामा लिएर भोगचलन गर्दै आएको छ ।