हेल्थ टिभी अनलाइन \काठमाडौं : मानसिक स्वास्थ्य अवस्था कमजोर भएका एक जना युवकले अब भने उपचार पाउने भएका छन्। झापा हल्दिबारीका २३ वर्षीय गंगाप्रसाद ढकालले उपचार नपाएका कारण उनलाई घरमा बाँधेर राखिएको थियो । झापास्थित बीएण्डसी अस्पतालका कार्यकारी निर्देशक दुर्गा प्रसाइले उनको सम्पूर्ण उपचार नि:शुल्क गरिदिने भन्दै उनको उद्धार गरेका हुन्।

मानसिक रोगका बिरामी ढकालका विषयमा विभिन्न सञ्चार माध्यममा खर्च अभावमा उपचार नपाएर बाँधिएर बसेको भन्ने जानकारी पाएपछि आफुले उद्धार गरी सम्पुर्ण उपचार नि:शुल्क गरिदिने घोषणा गरेको अस्पतालका कार्यकारी निर्देशक प्रसाइले बताए ।

उनले कुनै पनि व्यक्ति पैसा नभएर उपचारबाट बञ्चित हुन हुँदैन भनेर ढकालको उद्धार गरेकाे जनाए । उनको उद्धार गरी आजै सम्पूर्ण स्वास्थ्य जाँच सुरु गरिसकिएको अस्पतालका जनसम्पर्क अधिकृत प्रमिस गिरीले जानकारी दिए ।

यसभन्दा अघि पनि बीएण्डसी अस्पतालले आर्थिक अभावमा उपचार नपाएका बिरामीको उद्धार गर्दै आएको जनाएकाे छ ।