जङ्गली च्याउ खाँदा बालकको मृत्यु, सात बिरामी

जङ्गली च्याउ खाँदा बालकको मृत्यु, सात बिरामी

म्याग्दी : मङ्गला गाउँपालिका–१ पूर्णगाउँमा जंगली च्याउ खाँदा एक बालकको मृत्यु भएको छ। स्थानीय जमुना कुँवरका छोरा ऋषिको उपचारको क्रममा पोखराको मणिपाल अस्पतालमा ज्यान गएको हो ।

वनबाट ल्याएको च्याउको तरकारी बनाएर खाएपछि परिवारका छ बिरामी भएका थिए। विषालु च्याउ खानेबित्तिकै बान्ता, पखाला र टाउको दुख्न थालेपछि स्वास्थ्यचौकीमा उपचार गरिएको थियो। थप उपचारका लागि पोखरा लगिएको अवस्थामा बालक ऋषिको मृत्यु भएको राष्ट्रिय जनजागृति माविका प्रधानाध्यापक टेक राम्जालीले जानकारी दिए।

उपचार गराइरहेका अन्य बिरामीको अवस्था सुधारोन्मुख छ। थोरै खानेलाई समान्य असर देखिए पनि तीनै जनाले धेरै खाएकाले सिकिस्त भएको चिकित्सको भनाइ उद्धृत गर्दै राम्जालीले बताए।

सात बिरामी

यस्तै जङ्गली च्याउ खाँदा बागलुङको पश्चिम ढोरपाटन नगरपालिका वडा नं २ मा सात बिरामी परेका छन्।

शनिबार जङ्गलबाट ल्याएको च्याउ खाँदा ढोरपाटन नगरपालिका–२ सेराका २४ वर्षीय सुजाता थापा, छोरा पाँच वर्षीय  आयुष थापा, बडिगाड गाउँपालिका–३ सिसाखानी घर भई हाल ढोरपाटन–२ सेरामा बस्दै आएका ३५ वर्षीय लेखबहादुर थापा, उनकी  श्रीमती २४ वर्षीया प्रेमकुमारी पुन, छोरा पाँच वर्षीय सन्दीप थापा, १४ वर्षीय सहिस पुन र ढोरपाटन नगरपालिका–२ तारीखेतका ५८ वर्षीया मनिकला महत बिरामी परेका हुन्।

च्याउ खाएपछि बिरामी परेका सातै जना अचेत अवस्थामा रहेको सूचनापछि तत्काल उद्धार गरी बुर्तिबाङ प्राथमिक स्वास्थ्य केन्द्रमा उपचारका लागि लगिएको इलाका प्रहरी कार्यालय बुर्तिबाङका प्रमुख ओमप्रकाश यादवले बताए।