काठमाडौं : सांसदहरूले बिरामी नभएका कर्मचारीले पनि औषधि उपचार भत्ता पाउने व्यवस्था ठिक नभएकाे भन्दै याे व्यवस्था हटाउन माग गरेका छन्।

राज्यव्यवस्था समितिको आइतबारको बैठकमा संघीय निजामती सेवाको प्रस्तावित विधेयकमाथिको छलफलमा धेरैजसो सांसदहरुले बिरामी नभएकालाई औषधि उपचार भत्ता दिने व्यवस्था ठीक नभएको धारणा राखेका हुन्।

सांसदहरू पम्फा भुसाल र जनार्दन शर्माले यो व्यवस्था विधेयकबाट हटाउन माग गरे। अर्का सांसद राजकिशोर यादवले बिरामी नहुँदा पनि उपचार खर्च पाउने व्यवस्थालाई ‘चोर बाटो, दलालीकरण, भ्रष्टीकरण’को संज्ञा दिए। सांसदहरू नवराज सिलवाल, छक्कबहादुर लामा, रामकुमारी झाँक्रीलगायतले कर्मचारीहरूलाई प्रोत्साहन गर्न छुट्टै प्याकेज ल्याए पनि बिरामी नहुँदा खर्च दिन नहुने धारणा राखे।

सांसद यशोदा सुवेदीले अवकाश पाइसकेका कर्मचारीलाई चाडपर्व भत्ता दिने कि नदिने भनेजस्तै बिरामी नहुँदा पनि उपचार खर्च पाउने कि नपाउने भन्ने विषयमा पनि छलफल गर्न आवश्यक रहेको बताइन् ।