फ्रिज नहुँदा रगत संकलनमा समस्या

फ्रिज नहुँदा रगत संकलनमा समस्या

दाङ : राप्ती प्रादेशिक अस्पताल तुलसीपुरमा रहेको कालिकादेवी रक्तसञ्चार केन्द्रमा रगत सङ्कलन गर्न आवश्यक फ्रिज अभाव छ। फ्रिज नहुँदा आवश्यकतानुसार रगत सङ्कलन गर्न नसकिएको केन्द्र प्रमुख सीतम रेग्मीले बताए।

अहिलेको त्यो फ्रिजमा ४० देखि ४५ पिन्टसम्म मात्रै रगत सङ्कलन गर्न सकिने उहाँको भनाइ छ । तर रक्तदान शिविर सञ्चालनमा धेरैले रक्तदान गर्ने भएकाले फ्रिजमा आवश्यकतानुसार संकलन गर्न सकिने अवस्था छैन। रक्त सञ्चार केन्द्र सञ्चालनमा आएपछि पछिल्लो समय रक्तदान गर्नेको सङ्ख्या बढेकालेठूलो खालको फ्रिज आवश्यक पर्ने उनको भनाइ छ ।

तुलसीपुर केन्द्रमा आठ\नौ सय पिन्ट रगत स्टक राख्न सक्ने फ्रिज आवश्यक छ। साथै सङ्कलन भएको रगत ३५ दिनभन्दा बढी राख्न नमिल्ने भन्दै त्यहीअनुसार स्टक राख्ने गरेको उनकाे भनाइ छ।

नेपाल रेडक्रसले सञ्चालन गरिरहेको उक्त रक्त सञ्चार केन्द्रमा पटक–पटक ठूलो फ्रिज ल्याउने कुरा चले पनि अझै ल्याउन सकिएको छैन। फ्रिज ल्याउने कार्यमा पहल भइरहेको रेडक्रस दाङका अध्यक्ष नारायणप्रसाद शर्माले जानकारी दिए।