गर्मीले बालबालिका प्रभावित भएपछि त्रियुगाका विद्यालय तीन दिन बन्द

गर्मीले बालबालिका प्रभावित भएपछि त्रियुगाका विद्यालय तीन दिन बन्द

उदयपुर : गर्मीका कारण बालबालिका प्रभावित भएपछि त्रियुगा नगरपालिकाले विद्यालयको पठनपाठन तीन दिन बन्द गरेको छ। नगर कार्यपालिकाकाले बैठकले बुधबारदेखि शुक्रबारसम्म तीन दिन बिदा गरेको हो।

असारको पछिल्लो सातादेखि उदयपुरको तामक्रम ४३ डिग्रीदेखि ४७ सम्म पुगेपछि विद्यालयहरूमा गर्मी बिदा दिइएको त्रियुगा नगरपालिकाका प्रवक्ता केदार दनुवारले बताए।

पछिल्लो एक साता तापक्रम बढेसँगै बालबालिका विद्यालयमै बेहोश हुन थालेपछि बिदा दिने निर्णय गरिएको नगरप्रमुख बलदेव चौधरीले बताए।

नगरपालिकाको शिक्षा इकाइले कार्यपालिकाको बिदा दिने निर्णय कार्यान्वयन गर्न गराउन मंगलबार सूचना नै जारी गरेको थियो।

भित्री मधेसमा पर्ने कटारी, त्रियुगा, बेल्टार, रामपुर क्षेत्रमा सर्वसाधरण गर्मीका कारण प्रभावित भएका छन्।