रामेछाप : मन्थली नगरपालिका–६ कुनौरीमा एम्बुलेन्स दुर्घटना हुँदा एकजनाको मत्यु भएको छ। एकजना गम्भीर घाइते छन्।

दुर्घटनामा चालक निरबहादुर श्रेष्ठको मृत्यु भएको हो। उनी सिन्धुलीको गोलञ्जोर गाउँपालिका–७ का हुन्। नेपाल रेडक्रस सोसाइटी सिन्धुलीद्वारा सञ्चालित बा २१ च ७५२५ नम्बरको एम्बुलेन्स रामेछापमा बिरामी लिन आउने क्रममा दुर्घटना भएको जिल्ला प्रहरी कार्यालयले जनाएको छ।

घाइते भएका गोलञ्जोर गाउँपालिका–७ का सुरज श्रेष्ठलाई उपचारको लागि काभ्रेको धुलिखेल अस्पताल लगिएको जिल्ला प्रहरी कार्यालय रामेछापले जानकारी दिएको छ।

सडकबाट २०० मिटर तल खसेको एम्बुलेन्स क्षतविक्षत भएको छ। दुर्घटनाको कारणबारे कसरी भयो भन्ने खुलेको छैन। यसबारे अनुसन्धान भइरहेको प्रहरीले जनाएको छ।