चितवन : जिल्लामा गर्मी बढेसँगै रगतको अभाव देखिएको छ। क्षेत्रीय रक्तसञ्चार केन्द्र भरतपुरका अनुसार अहिले केन्द्रमा आकस्मिक बाहेकका बिरामीका लागि आवश्यक रगत अभाव भएको हो।

केन्द्रका प्रमुख रमेशकान्त पौडेलका अनुसार जिल्लामा दैनिक १५० युनिट रगतको आवश्यक पर्ने जानकारी दिए। तर अहिले केन्द्रमा ७० देखि ७५ युनिट मात्रै रगत छ। गर्मी बढेसँगै रगतको आवश्यकता हुने बिरामीको चाप बढ्ने तर रक्तदान कार्यक्रम नहुने गर्दा रगतको अभाव देखिएको हो।

यो समयमा क्याम्पसहरुमा परीक्षा हुनु, गर्मी बिदा हुनु, रक्तदातामा उत्साह नहुनु, गर्मीका कारण शरीर शिथिल हुनु, राजनीतिक दलको क्रियाशीलता कम हुनुलगायतका कारण रगतको समस्या देखिएको बताइएको छ। अस्पतालमा आएका बिरामीका आफन्त र स्वयंसेवी रक्तदाताको भरमा केन्द्र सञ्चालन गर्नुपरेको उनले बताए।

जिल्लामा दुई ठूला मेडिकल कलेज, क्यान्सर अस्पताल, भरतपुर अस्पताल र २० भन्दा बढी निजी अस्पतालहरु छन्। ती अस्पतालबाट दैनिक शल्यक्रियाका लागि रगतको माग हुँदै आएको पौडेलले जानकारी दिए।

पौडेलका अनुसार सङ्कलन गरेर राखिएकोभन्दा ताजाको माग भएपछि केन्द्रलाई रगत दिन समस्या परेको हो। बिरामीलाई रगत आवश्यक परेर लिन जाँदा रगत दिने व्यक्तिसँगै लैजानुपर्ने बाध्यता छ।

चितवनमा मात्रै नभएर अहिले देशभर नै रगतको अभाव देखिएको उहाँले जानकारी दिए। केन्द्रले चितवन, धादिङ, नवलपुर, नवलपरासी, बारा, पर्सा, तनहुँ, लमजुङ र गोरखालगायत १२ वटा जिल्लाबाट रगत सङ्कलन गर्दै आएको छ।

यी सबै जिल्लामा गर्मीका कारण रक्तदाताकोे अभाव भएपछि रगतको समस्या देखिएको हो। जिल्लाका अस्पतालमा उपचार गराउन आउने बिरामीको सङ्ख्या उच्च रहेकाले रगतको माग बढिरहेको छ।