काठमाडौं : संघीय मामिला तथा सामान्य प्रशासन मन्त्रालयले स्वास्थ्य समूहका कर्मचारीको समायोजन टुंग्याएको भए पनि समस्या झनै जटिल बन्दै गएको छ । सामान्य प्रशासनले आइतबार स्वास्थ्य मन्त्रालयमा समायोजनको सूची बुझाएको थियो । तर यता कर्मचारीले भने तत्काल पत्र नपाउने भएका हुन्।

स्वास्थ्य मन्त्रालयका  प्रशासन महाशाखा प्रमुख जनार्दन गुरागाइँले समायोजन पहिलेको भन्दा पनि बिग्रेर आएको भन्दै त्यसलाई मिलाउन अझै समय लाग्ने बताए । उनले भने, ‘समायोजनमा ठुलो समस्या अझै कायम छ यसलाई समाधान गर्न केही समय त पक्कै लाग्छ त्यसैले असार महिनाभरी पत्र पठाउन सकिंदैन्।’

यता हिजो नै समायोजनको सूची मन्त्रालयमा आएको भन्दै सोमबार मन्त्रालयमा कर्मचारीहरुको बिहानै देखि भिड नै लागेको थियो । मन्त्रालयमा आएका कर्मचारीले आफू कहाँ परे भन्ने मात्र जानकारी पाए हुन्थ्यो भन्दै प्रवक्ता र प्रशासन प्रमुखलाई कुरेर बसेका थिए ।

मन्त्रालयले समायोजन पत्र मन्त्रालयबाट दिने नभई कर्मचारी कार्यरत कार्यालयमा नै पठाउने गुरागाइँले बताए ।  समायोजनमा चित्त नबुझाएका १४ हजार बढी स्वास्थ्यका कर्मचारीका गुनासा परेका थिए । ती गुनासा पनि खासै सम्बोधन नभएको देखिएकाे मन्त्रालयले जनाइकाे छ ।  सामान्यले २७ हजार कर्मचारीको सूची स्वास्थ्य मन्त्रालयमा हिजो मात्रै बुझाएको थियो ।

आर्थिक वर्ष सकि नै लाग्दाको कामकाजको चटारोका कारण पनि मन्त्रालयले कर्मचारी समायोजनको पत्र तत्काल पठाउने छाँटकाँट देखिंदैन्।