काठमाडौं : चिकित्सा पेशामा रहेकाहरूले लाइसेन्स नवीकरण गर्नुपर्ने भएको छ । मेडिकल काउन्सिलबाट एकपटक लाइसेन्स लिएर सधैँ चिकित्सा अभ्यास गर्न पाउने व्यवस्था हटाउन लागिएको हो ।

यो कार्यक्रम लागू गर्न सैद्धान्तिक सहमति भइसकेको छ। नयाँ व्यवस्थाअनुसार लाइसेन्स नवीकरणका लागि निरन्तर पेशा उन्नयन (कन्टिन्युइङ प्रोफेसनल डेभलपमेन्ट र सीपीडी) कार्यक्रमबाट पाँच वर्षभित्रमा १०० अंक प्राप्त गर्नुपर्नेछ ।

सीपीडीअन्तर्गत लिखित वा प्रयोगात्मक परीक्षा भने हुनेछैन। डाक्टरहरूले आफ्नो विषयमा अद्यावधिक रहनुपर्छ, चिकित्सा क्षेत्रको उपलब्धि जान्नुपर्ने डा. शर्माले बताए। उनले यो कार्यक्रमले डाक्टरको ज्ञान र सीपलाई अझ परिस्कृत गर्नुका साथै र चिकित्सक र बिरामीबीच उत्पन्न हुने असमझदारी न्यूनीकरण हुने दाबी गरे।

अस्वाभाविक रूपमा लेखिने औषधि र परीक्षणलाई व्यवस्थित गर्नुका साथै चिकित्सा क्षेत्रमा हुन सक्ने संक्रमण न्यूनीकरण गर्न काउन्सिलले सीपीडी कार्यक्रम ल्याउन लागेको हो । दक्षिण एसियामा यो कार्यक्रम लागू गर्ने भुटानपछि नेपाल दोस्रो मुलुक हुने बताइएको छ।’

डाक्टरहरूले वेबसाइटमार्फत आफूले प्राप्त गरेको अंक थाहा पाउनेछन्। सीपीडी कार्यक्रमअन्तर्गत डाक्टरहरूले ३० अंक अनिवार्य भनेर तोकिएको विषयबाट र ७० अंक आफ्नो व्यावसायिक रुचिको क्षेत्रबाट हासिल गर्न सक्छन् ।

अनिवार्य विषयअन्तर्गत बेसिक लाइफ सपोर्ट सिस्टम, मेडिकल इथिक्स, कम्युनिकेसन स्किल, इन्फेक्सन प्रिभेन्सन एन्ड कन्ट्रोल, र्‍यासनल युज अफ ड्रग पर्छन् । ‘मेडिकल इमर्जेन्सी एन्ड प्राक्टिस मेनेजमेन्ट एन डेन्टिस्ट्री’ विषय थप दन्त चिकित्सकका लागि तय गरिएको काउन्सिलका अध्यक्ष डा. धर्मकान्त बाँस्कोटाले बताए।