रोल्पा : सुनिल स्मृति गाउँपालिका सुलिचौरमा रहेको प्राथमिक स्वास्थ्य केन्द्रले भौतिक पूर्वाधार अभावको सामना गरिरहेको छ। दैनिक ४०\५० जना बिरामी आउने यहाँ आपतकालिन अवस्थामा चाहिने अक्सिजनको अभाव भएको धेरै समय भयो।

राति बिजुली गयो भने बिरामी र स्वास्थ्यकर्मीलाई आपत पर्छ। त्यस्तै, कतिपय आवश्यक औषधिको समेत अभाव छ।

निर्वाचनपछि गाउँमा आएको गाउँपालिका स्वास्थ्य केन्द्रको छेउमै छ। त्यस्तै प्राथमिक स्वास्थ्य केन्द्रको सबै जिम्मेवारी पाएको वडा कार्यालय पनि छेउमै छ। गाउँपालिकाको ध्यान यता गएकाे देखिँदैन। सरकारले हरेक प्राथमिक स्वास्थ्य केन्द्र व्यवस्थापन समितिको अध्यक्षको जिम्मेवारी सम्बन्धित वडाध्यक्षलाई दिएको छ तर सम्बन्धित निकायलाई स्वास्थ्य संस्थामा भएकाे अभावबारे ध्यान दिएको देखिँदैन।

रोल्पामा एक अस्पताल र दुई वटा प्राथमिक स्वास्थ्य केन्द्र छन्। यी सबै संस्थामा स्वास्थ्यकर्मी भए पनि पर्याप्त औषधि नहुँदा बिरामीहरुको रोजाइ निजी अस्पतालमा पर्ने गरेको छ। स्थानीय तहले आवश्यकताका बारेमा छलफल नै नगरेर सामाग्री र औषधि खरिद गर्ने गरेको छ।