संखुवासभा : खाँदबारी अस्पतालले रसिदविनै सेवाग्राहीसँग निरोगिताको प्रमाणपत्रबापत अवैध असुली गर्दै आएको छ।

चिकित्सकले आफूखुसी सेवाग्राहीसँग अवैध रूपमा मनपरी रकम असुल्दासमेत अस्पताल विकास समितिले चासो देखाएको छैन। निरोगिताको प्रमाणपत्र दिँदा चिकित्सकले आफूखुसी रकम असुलेको विषयमा आफूलाई कुनै जानकारी नभएको अस्पताल विकास समितिका अध्यक्ष तथा जिल्ला समन्वय समितिका प्रमुख सुमन शाक्यले बताए।

‘अस्पतालका कर्मचारीले नियमविपरीत रकम असुलेको पाइए बन्द गर्छौं,’ उनले भने, ‘गलत भएको प्रमाणित भए कारबाही प्रक्रिया अघि बढाउँछौँ।’

जिल्ला अस्पताल खाँदबारीको नागरिक बडापत्रमा निरोगिताको प्रमाणपत्र लिँदा २०० रुपैयाँ मात्रै शुल्क लाग्ने उल्लेख छ। तर, नयाँ नियुक्त हुने स्थायी शिक्षकले निरोगिताको प्रमाणपत्र लिँदा जिल्ला अस्पतालका चिकित्सकलाई रसिदविनै ६०० रुपैयाँ बुझाउँदै आएका छन्।