खलङ्गा : जिल्लामा सञ्चालित आँखा शिविरमा ९५१ बिरामीले सेवा लिएका छन्।

यही वैशाख २२ गतेदेखि २४ गतेसम्म सञ्चालित शिविरमा १८३ को आँखाको साधारण शल्यक्रिया गरिएको र १०४ को मोतियाविन्दुको शल्यक्रिया गरिएको आँखा उपचार केन्द्र जुम्लाका प्रमुख कालीबहादुर रावतले जानकारी दिए। शिविरमा बिरामीलाई आवश्यक औषधि र चश्मा निःशुल्क वितरण गरिएको थियो।

प्रमुख जिल्ला अधिकारी दुर्गा बन्जाडेले प्रत्येक वर्ष आँखाका बिरामीले घरआँगनमै उपचार गर्न पाउनु अवसर भएको बताए। आगामी दिनमा जिल्ला प्रशासनको तर्फबाट सहयोग गर्न तयार रहेको उनले बताए। शिविर सञ्चालनका लागि चन्दननाथ नगरपालिकाबाट ५० हजार रूपैयाँ सहयाेग गरेकाे जानकारी दिइयाे।

जुम्लामा आँखाका बिरामीले आफ्नै घरआँगनमा सस्तो र सुलभरूपमा सेवा लिन पाएकामा स्थानीयवासीले खुशी व्यक्त गरे। हिमालय आँखा अस्पताल पोखराको आयोजना तथा नेपाल नेत्रज्योति सङ्घ जुम्ला शाखाको सहयोगमा शिविर सञ्चालन गरिएको हो।