जाजरकोट : जिल्ला स्वास्थ्य कार्यालय जाजरकोटले महामारी हुन सक्ने ठाउँमा पठाएको औषधिको म्याद बाटोमै सकिएको छ। जिल्लामा महामारी हुनसक्ने सम्भावित ठाउँमा पठाउने भन्दै राखिएको औषधिको म्याद बाटोमै गुज्रेपछि समस्या भएको हो।

गर्मीयाम शुरु भएसँगै जिल्लाका विभिन्न ग्रामीण क्षेत्रमा झाडापखाला, टाइफाइड, ज्वरोजस्ता समस्या देखिन थालेपछि औषधि अभाव हुन नदिन जिल्लाका मुख्यमुख्य ठाउँमा तयारी हालतमा राखिएको औषधिको म्याद गुज्रेको पाइएको हो।

जिल्लाका सातवटा स्थानीय तहमा स्वास्थ्य कार्यालय, जाजरकोटले पठाएको औषधि म्याद नाघेका हो। अधिकांश औषधिको म्याद हप्ता दिन मात्र बाँकी रहेको छ भने केही औषधिको म्याद सकिएको पाइएको छ। सबैभन्दा बढी स्टासेफ नामक औषधिको म्याद गुज्रेको पाइएको नलगाड नगरपालिकाकाे नगरस्वास्थ्य शाखाले जनाएकाे छ।

जाजरकोटका दुर्गम गाउँमा पठाएको औषधि त्यस्तो भएमा तत्काल वितरण रोक्नका लागि पहल गर्ने स्वास्थ्य प्रमुख गौरव ढकालले बताए।