कालीकाेट : खाडाचक्र नगरपालिकाले नवजात शिशु र सुत्केरीको स्वास्थ्यमा सुधार ल्याउन स्वास्थ्यसम्बन्धी तीनवर्षे रणनीतिक योजना तयार पारेकाे छ। याेजनाअनुसार याे वर्ष थप आठ सामुदायिक स्वास्थ्य इकाइ स्थापना गरिनेछ ।

अन्य स्थानीय तहको तुलनामा स्वास्थ्य क्षेत्रमा बजेट बढी विनियोजन गरेको नगर स्वास्थ्य शाखा संयोजक रविन्द्र सेजुवालले बताए । विनियोजित बजेटबाट औषधि र उपकरण खरिद, स्वास्थ्यकर्मीलाई तलब, महिला स्वास्थ्य स्वयंसेविकालाई विभिन्न सामग्री उपलब्ध गराइएको छ।

विकटताले स्वास्थ्य संस्था पुग्न समस्या भएका खाडाचक्र ४ ताडी, वडा नं. ७ पिली, वडा नं. १० चौकी र वडा नं. ११ बदालकोटमा बर्थिङ सेन्टर सञ्चालन गर्ने नगरपालिकाले जनाएको छ ।

शतप्रतिशत संस्थागत सुत्केरी गराउने, सबै बालबालिकालाई अनिवार्य खोप सेवा उपलब्ध गराउने र चार पटक गर्भ जाँच गराउने, ६ महिनासम्म आमाको दूधमात्र खुवाउने र सबै नवजात शिशुलाई नाभी मलम उपलब्ध गराउने लक्ष्य रणनैतिक योजनामा समेटिएको छ ।

योजना अनुसार सुरक्षित मातृत्व, खोप सेवा, गर्भजाँच र स्वास्थ्य संस्थागत सुत्केरीका लागि  चेतनामूलक अभियान सञ्चालन गरिने नगर उपप्रमुख विजया विष्टले बताइन्।

त्यस्तै गर्भर्वतीको स्वास्थ्य जाँच गर्न स्वास्थ्य संस्थामार्फत घुम्ती रूपमा ‘अल्ट्रासाउण्ड’ सेवा सञ्चालन गर्ने  नगरपालिकाले जनाएको छ।