काठमाडौं : शहीद गंगालाल राष्ट्रिय हृदयकेन्द्रमा मुटुको शल्यक्रियाका क्रममा एक बालिकाको मृत्यु भएको छ। फरक समूहको रगत चढाइएकाले बालिकाको मृत्यु भएको परिवारको आरोप छ।

सोमबार बिहान बालिकाकाे मृत्यु भएको अस्पतालले जनाएको छ ।

उपचारका क्रममा गल्ती भए पनि रगत फरक भएकै कारणले बालिकाकाे मृत्यु भएकाे पुष्टी नभएको अस्पतालका निर्देशक डा. ज्योतिन्द्र शर्माले बताए। ‘बालिकाको मृत्यु भएको हो, तर रगत फरक भएकै कारणले भन्ने एकिन होइन’, उनले भने, ‘उनको शल्यक्रिया नै जटिल थियो।

उक्त विषयमा समिति बनाई छानविन प्रक्रिया अघि बढाएको  निर्देशक शर्माले बताए। दोषीलाई अवश्य कारबाही हुने उनकाे भनाइ छ।

मुटुको भल्भमा समस्या भएपछि १३ गते सर्लाही सिसौटियाकी पाँच वर्षीया आकृति कुमारीलाई गंगालालमा भर्ना गरिएको थियो। उनको १७ गते मुटुको ओपन हार्ट सर्जरी गरिएको हो। तर सोही क्रममा उनलाई फरक समूहको रगत चढाइएको अस्पतालले पनि स्वीकारेको छ। ओ पोजेटिभ रगत भएकी बालिकालाई ए पोजेटिभको रगत चढाइएको हो।

परिवार र आफन्तले दोषीलाई कारवाहीको माग राख्दै बालिकाको शव बुझ्न मानेका छैनन्। यस  विषयमा अस्पतालमा बैठक बसिरहेकाे छ ।