दमौली : तनहुँको बन्दीपुर गाउँपालिकाले विपन्न घरधुरीको स्वास्थ्य बिमा गराइदिएको छ। आर्थिक रूपमा असहाय परिवारलाई स्वास्थ्य बिमामा सहभागी गराउने उद्देश्यसहित गाउँपालिकाले चालू आर्थिक वर्षमा ३०० घरपरिवारको बिमा गराएको हो।

आर्थिक अभावमा स्वास्थ्य बिमामा सहभागी हुन नसक्ने घरपरिवार छनोट गरी गाउँपालिकाले नै बिमा गरिदिएको गाउँपालिकाका अध्यक्ष पूर्णसिंह थापाले जानकारी दिए। उनका अनुसार छ वडाबाट ५०\५० घरधुरी छनोट गरी स्वास्थ्य बिमा गराइएको छ । स्वास्थ्य बिमाका लागि गाउँपालिकाले चालू आर्थिक वर्षमा सात लाख ५० हजार रूपैयाँ लगानी गरेको छ।

गाउँपालिकाभित्रका सबै नागरिकलाई स्वास्थ्य बिमामा सहभागी गराउन यो कार्यक्रम ल्याइएको उनले बताए। आर्थिक रूपमा सम्पन्न भएका घरपरिवार स्वास्थ्य बिमामा सहभागी हुन सक्ने भए पनि गरीब तथा विपन्न घरपरिवार स्वास्थ्य बीमाबाट बञ्चित नहुन् भन्नका लागि योजना ल्याइएको थापाले जानकारी दिए।

वार्षिक रूपमा ३०० घरपरिवारको  सात लाख ५० हजार रूपैयाँ गाउँपालिकाले बेहोर्नेछ। तनहुँमा २०७४ भदौ १ गते स्वास्थ्य बिमा शुरुआत भएको थियो। तनहुँ जिल्लामा हालसम्म १० हजारभन्दा बढी घरधुरी स्वास्थ्य बिमामा आबद्ध भइसकेको स्वास्थ्य बिमा कार्यालयले तनहुँले जनाएको छ।