जुम्ला : सदरमुकाम खलङ्गादेखि पूर्वी भेगमा पर्ने पातारासी गाउँपालिकाले घरदैलोमै विशेषज्ञसहितको निःशुल्क स्वास्थ्य शिविर सञ्चालन गरेको छ।

कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका चिकित्सक बुनेशकुमार बादलसहितको दर्जन स्वास्थ्यकर्मीको टोली र औषधि घरदैलोमै पुर्याएर निःशुल्क स्वास्थ्य शिविरमार्फत सेवा दिइएको हो।

गाउँपालिकाद्वारा आयोजना गरिएको निःशुल्क स्वास्थ्य शिविरमा आँखा, कान, दाँत, हाडजोर्नी, छाला र स्त्री रोगसम्बन्धी जाँच गरिएको छ। शिविरको पहिलो दिनमै ५०० को स्वास्थ्य परीक्षण गरिएको छ। गाउँमै विशेषज्ञसहितको स्वास्थ्य सेवा पाएपछि स्थानीय खुशी भएको गाउँपालिका–४ डोलकाटीका लक्ष्मण बुढाले बताए।

‘स्वास्थ्य संस्थामा औषधि अभाव र विशेषज्ञ चिकित्सकको सेवा नदेखेका स्थानीयले सहजै स्वास्थ्य सेवा पाएपछि हामी अत्यन्त खुशी छौँ’, उनले भने। पटकपटक गाउँपालिका बाहिर वा कर्णाली स्वास्थ्य विज्ञान प्रतिष्ठान शिक्षण अस्पताल जुम्लाबाट विशेषज्ञ चिकित्सक ल्याएर निःशुल्क स्वास्थ्य शिविरमार्फत स्वास्थ्य सेवा प्रदान गर्ने गाउँपालिकाको योजना रहेको अध्यक्ष बोहोराले जानकारी दिए।