भीमदत्तनगर : कञ्चनपुरस्थित महाकाली अञ्चल अस्पतालमा विपन्न र असहायलाई वितरण गर्ने निःशुल्क औषधि अभाव भएको छ। बजेट अभावका कारण औषधि खरीदमा समस्या भएपछि लक्षित वर्गलाई औषधि वितरण बन्द गरिएको महाकाली अञ्चल अस्पताल प्रशासनले जनाएको छ।

अञ्चल अस्पतालभित्र रहेको सामाजिक सेवा केन्द्र एकाइले गरिब, असहाय, अपाङ्गता भएका व्यक्ति, ज्येष्ठ नागरिक, महिला स्वास्थ्य स्वयंसेविका, शहीद परिवारलगायतलाई निःशुल्क औषधि दिँदै आइरहेको थियो। चार दिनअघि अस्पतालले सूचना जारी गर्दै बजेट अभावका कारण औषधि र आंशिक छुट दिन नसक्ने बताएको छ।

महाकाली अञ्चल अस्पतालका सूचना अधिकृत केशवदत्त अवस्थीले औषधिका लागि संघीय सरकारबाट चालू आर्थिक वर्षमा तीन लाख रूपैयाँमात्रै आएको जानकारी दिए। ‘ त्याे औषधि सकिएपछि यहाँ समस्या भयो’, उनले भने’, ‘औषधि उपलब्ध गराउनका लागि सुदूरपश्चिम प्रदेश सरकारमा पहल गरिरहेका छौँ।’

औषधि पाउन छाडेपछि दैनिक २० देखि ३० जना बिरामी मारमा परेका छन्।