हेटौँडा : नसर्ने रोगको समयमा नै पहिचान, रोकथाम, उपचार र त्यसबाट हुने जटिलता न्यूनीकरण गर्न स्वास्थ्य परीक्षण गर्ने उद्देश्यले प्रदेश ३ सरकारले मुख्यमन्त्री स्वास्थ्य परीक्षण कार्यक्रम शुरु गर्ने भएको छ।

हेटौँडा अस्पतालबाट चैत १७ गतेदेखि मुख्यमन्त्री स्वास्थ्य परीक्षण कार्यक्रम शुरु हुने प्रदेशको सामाजिक विकास मन्त्रालयका प्रवक्ता सतिश विष्टले जानकारी दिए। यसबाहेक धादिङ अस्पताल, भरतपुर अस्पताल, चौतारा अस्पताल र सिन्धुली अस्पतालमा पनि उक्त कार्यक्रम लागू हुने उनले बताए।

गत माघ २४ गतेको मन्त्रिपरिषद् बैठकमाट पारित कार्यविधिअनुसार मुख्यमन्त्री स्वास्थ्य परीक्षण कार्यक्रम हेटौँडा अस्पतालबाट शुरु हुनेछ। चालु आर्थिक वर्षमा पाँच जिल्ला अस्पतालबाट सेवा सुरु गर्ने जनाइएको छ।

चालु आवमा ३० वर्षभन्दा माथिका विपन्न, लोपोन्मुख तथा अल्पसंख्यक जातिहरू, दलित, महिला स्वास्थ्य स्वयंसेविका, शहीद तथा बेपत्ता परिवार, सशस्त्र द्वन्द्वका घाइतेलाई निःशुल्क स्वास्थ्य परीक्षण गरिने बताइएको छ।

त्यसका लागि वडा कार्यालयको सिफारिस अनिवार्य गरिएको छ। वडाको सिफारिसको आधारमा लक्षित वर्गका नागरिकले अस्पतालबाट १६ प्रकारको जाँच सेवा निःशुल्क पाउनेछन्। समग्र स्वास्थ्य परीक्षण प्याकेजमा यूएसजी, ईसीजी, फोक्सो, कलेजो, मिर्गौला जाँच, रगत परीक्षणलगायत छन्।