बेनी : म्याग्दीकाे बेनीमा गण्डकी प्रदेश सरकार मातहतमा रहेको स्वास्थ्य कार्यालय उद्घाटन गरिएको छ।

गत साउनमा खारेज भएको जिल्ला स्वास्थ्य कार्यालय गण्डकी प्रदेश, सामाजिक विकास मन्त्रालयअन्तर्गत रहने गरी पुनःस्थापना भएको हो। कार्यालयको उद्घाटन बुधबार गण्डकी प्रदेश, सामाजिक विकासमन्त्री नरदेवी पुनले गरिन्।

कार्यालयमा जनस्वास्थ्य अधिकृतसहित ११ कर्मचारीको दरबन्दी छ । प्रदेश सरकारमातहत रहेका जिल्लाका स्वास्थ्य संस्थामा प्राविधिक सहयोग, कर्मचारी र स्वास्थ्यकर्मीको क्षमता विकास, तालीम सञ्चालन, औषधि आपूर्तिसँगै अन्तरपालिका समन्वयको काम गरिने जिल्ला स्वास्थ्य कार्यालयका प्रमुख भीमप्रसाद आचार्यले जानकारी दिए।

कार्यालयलाई यस वर्ष प्रदेश सरकारमार्फत  एक करोड ८४ लाख रूपैयाँ प्राप्त भएको छ। कार्यालयको उद्घाटन गर्दै मन्त्री पुनले स्वास्थ्य क्षेत्र अत्यन्तै संवेदनशील रहेकाले जनतालाई सरल र सहज तवरले सेवा प्रवाहको लागि गण्डकी प्रदेशका ११ वटै जिल्लामा स्वास्थ्य कार्यालय स्थापना गरिएको बताए।