काठमाडौं : स्पार्क हेल्थ होम अस्पताल कालिमाटीले २७ औँ वार्षिकोत्सवको अवसर पारेर निःशुल्क स्वास्थ्य शिविर सञ्चालन गर्ने भएको छ।

यही फागुन ११ गते हुने एकदिने शिविरमा हाडजोर्नी तथा नशारोगसम्बन्धी बिरामीले सेवा लिन सक्ने अस्पतालका निर्देशक रूपेश अधिकारीले जानकारी दिए। ‘हामीले विशेषगरी हाडजोर्नी र नशासम्बन्धी बिरामीलाई मध्यनजर गरेर यो शिविर राखेका हौँ’, उनले भने, ‘करिब ३०० जनाले सेवा लिने अपेक्षा गरेका छौँ।’

विशेषगरी हड्डी खिइएका,नशा च्यापिएका, प्यारालाइसिस, ढाड दुख्नेलगायत समस्या भएका बिरामीले यस शिविरबाट लाभ लिनसक्ने अस्पतालले जनाएको छ।

अस्पतालबाट सेवा लिई स्वास्थ्य लाभ लिएका बिरामीको विचार संगालिएको किताब ‘स्पार्कले दिएको नयाँ जीवन’ समेत साेही दिन विमोचन गरिनेछ।

शिविर बिहान ८ बजेदेखि ३ बजेसम्म चल्नेछ। प्राकृतिक चिकित्सामा छुट्टै पहिचान बनाउन सफल अस्पतालले सामाजिक उत्तरदायित्व अन्तर्गत वार्षिकोत्सवमा निःशुल्क स्वास्थ्य शिविर राख्दै आएको छ।