हेल्थ टिभी अनलाइन : आज असोज १० अर्थात सुरक्षित गर्भपतन सेवा दिवस । नेपालमा विभिन्न कार्यक्रम गरी यो दिवस मनाइँदैछ । नेपालमा विस २०५९ साल असोज १० गते सुरक्षित गर्भपतन सेवाले कानूनी मान्यता पाएको हो । त्यही दिनलाई सुरक्षित गर्भपतन सेवा दिवसको रुपमा मनाउने गरिन्छ ।

विश्वभर हरेक वर्ष आधा जसो गर्भ अनिच्छित रुपमा रहने गरेको तथ्यांक छ । अनिच्छित गर्भमध्ये ६० प्रतिशत र कुल गर्भमध्ये ३० प्रतिशत गर्भपतन हुने गरेको पाइन्छ । विश्वव्यापी रुपमा हुने ४५ प्रतिशत गर्भपतन असुरक्षित रुपमा गरिने गरेका छन् भने ७० लाख महिला असुरक्षित गर्भपतनका कारण अस्पता भर्ना हुने गरेको पाइएको छ । असुरक्षित गर्भपतन मातृमृत्युको प्रमुख कारण हो । ५ देखि १३ प्रतिशत असुरक्षित गर्भपतनका कारण मातृ मृत्यु हुने गरेको पाइन्छ ।

परिवार कल्याण महाशाखाको तथ्यांक अनुसार नेपालमा हुने करिब ५२ प्रतिशत गर्भपतन असुरक्षित छन् । ७७ वटै जिल्लामा गर्भपतन सेवा उपलब्ध छ । सरकारी स्वास्थ्य संस्थामा गर्भपतन सेवा नि:शुल्क छ । गर्भवती महिलाको मन्जुरीमा १२ हस्पतासम्म र विशेषअवस्थामा २८ हप्तासम्म गर्भपतन गराउन पाउने कानून छ ।