हेल्थ टिभी अनलाइन \काठमाडौं : पछिल्लो केही दिन यता कोरोना भाइरसको संक्रमण दरमा केही कमी आएको भए पनि जोखिम भने उच्च नै रहेको स्वास्थ्य तथा जनसंख्या मन्त्रालयले जनाएको छ । मन्त्रालयकी प्रवक्ता डा संगीता मिश्राले गता साता भन्दा यो साता संक्रमण दरमा ११ प्रतिशतले कमी आएको जनाएकी हुन्।

उनले संक्रमण दरमा कमी आएको भए पनि अझै पनि संक्रमण दर ३४ प्रतिशतभन्दा बढी भएकाले यसको जोखिम भने कायमै रहेको जनाइन्। अझै पनि धेरै व्यक्तिहरु कोरोना विरुद्धको खोप लगाउन बाँकी भएकाले र नयाँ भेरियन्टको संक्रमण जोखिम कायम नै भएकाले कोरोनाको जोखिम कम नभएको भन्दै सबैले जनस्वास्थ्यका मापदण्ड पालना गर्नुपर्ने उनले जिकीर गरिन्।

नेपालमा हालसम्म १० लाख ९१ हजार ८८४ जनामा कोरोना संक्रमण पुष्टि भएको छ भने ११ हजार ७६४ जनाको कोरोना संक्रमणबाट मृत्यु भएको छ ।