हेल्थ टिभी अनलाइन \काठमाडौं : ओमिक्रोन भेरियन्ट कोभिड १९ को सबैभन्दा पछिल्लो भेरियन्ट हो ।

यो भेरियन्ट सबैभन्दा पहिले दक्षिण अफ्रिकामा पुष्टि भएको थियो । अहिले नेपाल लगायत ४० भन्दा बढी देशमा देखिसकेको छ । यो भेरियन्ट देखिएका देशहरुमा संक्रमण दर ह्वात्तै बढेको छ । तर यो भेरियन्ट कत्तिको संक्रामक छ र अहिले लगाइरहेका खोपहरुले काम गर्छन की गर्दैनन् भन्नेवारेमा भने अध्ययन भइरहेको छ ।

यस विषयलाई लिएर वैज्ञानिकहरुले अध्ययन गरिरहेकाले अहिले नै यो भाइरस कस्तो हो र अन्य भन्दा बढी संक्रामक छ छैन भन्ने ठोस तथ्य आइसकेको छैन्। एकपटक कोभिड संक्रमण भइसकेका र खोप लगाएकालाई पनि यो भाइरसले संक्रमण हुनसक्ने विज्ञहरुले बताएका छन्। त्यसैले पनि यसबाट बच्न मास्कको अनिवार्य प्रयोग गर्न भौतिक दूरी कायम गर्न तथा सेनिटाइजरको प्रयोग गर्न जरुरी देखिएको छ ।