हेल्थ टिभी अनलाइन \काठमाडौं : दक्षिण अफ्रिकामा पहिलोपटक देखिएको कोरोनाको आमिक्रोन भेरियन्ट भारतमा पनि पुष्टि भएको छ ।

भारतको कर्नाटकमा ओमिक्रोनका दुई जना संक्रमित भेटिएको भारतीय सञ्चार माध्यमहरुले जनाएका छन्। संक्रमित मध्ये एक जना ४६ वर्षका हुन् भने अर्का ६६ वर्षका भएको बताइएको छ ।

भारतको स्वास्थ्य मन्त्रालयले यसबारेमा पुष्टि गरेको छ । स्वास्थ्य सचिव लभ अग्रवाल सामाजिक सञ्जालमार्फत दुई जनामा ओमिक्रोन पुष्टि भएको र उनीहरुलाई आइसोलेसनमा राखिएको बताएका हुन्। उनले यसबारे जानकारी दिँदै यो नयाँ भेरियन्ट तीब्र रुपमा फैलने आशंका व्यक्त गरेका छन् ।

भारतमा यो संक्रमण पुष्टि भएपछि नेपालमा अझ बढी जोखिम बढेको भन्दै बेलैमा सतर्कता अपनाउनपर्नेमा विज्ञहरुले सुझाव दिएका छन्। भारतसँगको खुला सिमानाका कारण नेपालमा पनि ओमिक्रोन भित्रिन सक्ने भन्दै उनीहरुले अहिले नै तयारी गर्नुपर्ने बताएका हुन्।