हेल्थ टिभी अनलाइन \काठमाडौं : कोभिड १९ को खोप प्रमाणपत्रको पारस्परिक मान्यताका लागि भारत सरकार र स्वास्थ्य मन्त्रालयबीच एक समझदारी पत्रमा हस्ताक्षर भएको छ ।

आज स्वास्थ्य तथा जनसंख्या मन्त्रालयमा आयोजित एक समारोहका बीच स्वास्थ्य तथा जनसंख्या मन्त्री विरोध खतिवडाको उपस्थितिमा नेपालका लागि भारतीय राजदूत विनय मोहन क्वात्रा र स्वास्थ्य मन्त्रालयका सचिव डा रोशन पोखरेलबीच कोभिड खोप प्रमाणपत्रको मान्यताका लागि समझदारी पत्रमा हस्ताक्षर भएको हो ।

कोभिड खोप पूर्ण मात्रा लगाइसकेका दुवै देशका यात्रुहरुको यात्रा सहज बनाउन यो समझदारी पत्रमा हस्ताक्षर गरिएको र एक अर्कोको देशमा लगाइएका खोपलाई मान्यता दिइएको मन्त्रालयका सचिव पोखरेलले जनाए ।

यो सम्झौता भएसँगै अब नेपालमा लगाइएको खोपलाई भारतले मान्यता दिने र भारतमा खोप लगाएकालाई नेपालमा मान्यता दिइनेछ ।