हेल्थ टिभी अनलाइन \चितवन : चितवनको भरतपुरमा बाल स्वास्थ्यमा विशिष्टीकृत सेवा दिने उद्देस्यसहित ‘नानी बाबु बाल क्लिनिक’ खुलेको छ । आज एक कार्यक्रमकावीच चितवनका वरिष्ठ बाल रोग विशेषज्ञ डा विजयमान कायस्थले उक्त क्लिनिकको उद्घाटन गरेका हुन्।

उनले भरतपुरमा बालस्वास्थ्यमा केन्द्रित भएर खोलिएको उक्त क्लिनिकले धेरै बालबालिकालाई विशिष्टीकृत सेवा दिने र त्यसले बच्चाको उपचारकै लागि काठमाडौं वा अन्य स्थानमा जानपर्ने बाध्यता हटेको बताए । क्लिनिकका सञ्चालक बालरोग विशेषज्ञ डा ओमकृष्ण पाठकले चितवन र यस वरिपरीका बालबालिकाको स्वास्थ्य अवस्थालाई मध्यनजर गर्दै यहीं सेवा दिन सकियोस भनेर विशिष्टीकृत सेवासहित क्लिनिक खोलिएको बताए । उनले अहिलेसम्म चितवनमै नभएका केही बाल स्वास्थ्यका सेवाहरु पनि आफनो क्लिनिकबाट सुरु गरेको जनाए ।

आजबाट सेवा सुरु गरेको नानी बाबु क्लिनिकमा यी सेवाहरु उपलब्ध हुनेछन् :
– नेपाल सरकारद्वारा निशुल्क उपलब्ध गराएको बाहेकका खोप सेवाहरु
– हरेक नवजात शिशु तथा नानीबाबुहरुले गर्नैपर्ने श्रवण शक्तिको जाँच
– बाल दमको ‌निदान र उपचारको लागि जर्मन टेक्नोलोजीद्वारा फोक्सोको जाँच
– सुस्त विकास भएका नानी बाबुहरुको लागि बाल फिजियोथेरापीमा विशेष तालिमप्राप्त फिजियोथेरापिस्टद्वारा फिजियोथेरापी
– विशेष प्रबिधिद्वारा रगत ननिकालेर नै जन्डिसको जाँच
– नानीबाबुहरुको पोषण सम्बन्धी विशेष जाँच तथा परामर्श
– स्तनपान सम्बन्धी विशेष परामर्श
– गर्भावस्थामा शिशुमा देखिएको समस्याको परामर्श
– जन्मजात नवजात शिशुमा देखिन सक्ने समस्याहरुको ‌जाँच
– एनआइसीयुमा राखेर उपचार पश्चात घर गएका शिशुहरुको विशेष जाँच र उपचार।
– नानीबाबुको दाँतको समस्याको उपचार

बाल स्वास्थ्यसम्बन्धी सम्पूर्ण उपचार गरिने र त्यसका लागि क्लिनिक सकेसम्म बालमैत्री बनाएको डा पाठकले जानकारी दिए ।