हेल्थ टिभी अनलाइन \काठमाडौं : देशभर कोरोना संक्रमण कम हुँदै गएको छ । शुक्रबार स्वास्थ्य तथा जनसंख्या मन्त्रालयले जारी गरेको विज्ञप्ति अनुसार अब देशभर १० हजार १५१ जना मात्र सक्रिय कोरोना संक्रमित रहेका छन्।

जसमध्ये ९ हजार ३७९ जना होम आइसोलेसनमा रहेका छन् भने जम्मा ७७२ जना मात्र संस्थागत आइसोलेसनमा रहेको मन्त्रालयले जनाएको छ । उता उनीहरुमध्ये अहिले २४२ जना देशका विभिन्न अस्पतालका आइसीयूमा उपचाररत रहेका छन् भने ७८ जना भेन्टिलेटरमा रहेका छन्। नेपालमा शुक्रबारसम्म ११ हजार ३८८ जनाले कोरोना संक्रमणका कारण ज्यान गुमाएको तथ्यांक छ । यसैगरी कोरोना संक्रमणबाट निको हुने दर ९७ दशमलब ३ प्रतिशत रहेको छ ।

मन्त्रालयका अनुसार हालसम्म १ करोड ५६ लाख ४६ हजार ४०७ मात्रा खोप लगाइएको छ । यसमा ८६ लाख ६२ हजार २५० जनाले कोरोना विरुद्धको पहिलो मात्रा खोप लगाएका छन् । उता पूर्ण खोप पाउनेको संख्या ६९ लाख ८४ हजार १५७ रहेको छ । अहिले पनि नेपालमा खोप अभियान जारी रहेको छ भने खरिद गरेका खोप आउने क्रम पनि जारी रहेको छ ।