हेल्थ टिभी अनलाइन\ काठमाडौं : काठमाडौं महानगरमा आजदखि कोरोना विरुद्धको भेरोसेल खोपको पहिलो मात्रा लगाइने भएको छ ।

महानगरले एक सूचना जारी गर्दै काठमाडौंमा १८ वर्ष पुगेका सबैलाई कोरोना विरुद्धको भेरोसेल खोपको पहिलो मात्रा दिइने जनाएको हो । खोपका लागि काडमाडौंका ३२ वटै वडा कार्यालय तथा ५ वटा अस्पताललाई खोप केन्द्र तोकिएको छ । खोप केन्द्र तोकिएका अस्पतालहरुमा नेपाल प्रहरी अस्पताल, वीर अस्पताल, निजामती अस्पताल, परोपकार प्रसुती र वीरेन्द्र सैनिक अस्पताल रहेका छन्।

आफूलाई पायक पर्ने स्थानमा गएर आफनो परिचय पत्र देखाएर खोप लगाउन सकिने महानगरका स्वास्थ्य विभाग प्रमुख हरिबहादुर कुँवरले जानकारी दिए । खोप कार्यक्रम बिहान १० बजेखि ४ बजेसम्म सञ्चालन हुनेछ ।

खोप लगाउन जाँदा भिडभाड नगरी जनस्वास्थ्यका सम्पूर्ण मापदण्ड पालना गरिदिन पनि महानगरले सबैलाई आग्रह गरेको छ ।