हेल्थ टिभी अनलाइन \काठमाडौं : मृत्युदर बढी रहेको निपाह भाइरसको संक्रमण भारतमा समेत देखिन थालेपछि सरकारले नेपालमा पनि जोखिम बढेको भन्दै सबै जना सतर्क हुनुपर्ने जनाएको छ । पशुबाट मानिसमा सर्ने उक्त रोग निकै संक्रामक रहेको भन्दै यसबाट जोगिन र योसँग मिल्ने लक्षण देखिनासाथ स्वास्थ्य संस्थामा सम्पर्क गर्न स्वास्थ्य मन्त्रालयले आग्रह गरेको छ । पछिल्लो समय दक्षिण भारतको केरलामा निपाह भाइरस फेला परेसँगै नेपालमा पनि सतर्कता बढाइएको छ । यो भाइरस पशुपक्षीबाट मानिसमा सर्ने भएकाले यसलाई जूनोटिक रोगको वर्गमा राखिएको छ।

प्रायः सुँगुर, बङ्गुर र फलफूल खाने चमेरोमा संक्रमण भएपछि मानिसमा पनि सर्न सक्ने मन्त्रालयको भनाइ छ। निपाह भाइरस जनावरबाट जनावर, जनावरबाट मानिस र मानिसबाट मानिसमा सर्छ । संक्रमित चमेरोबाट सुँगुर, गाई गोरु जस्ता जनावर हुँदै मानिसमा संक्रमित पशुको संसर्गमा आएमा यो रोग सर्छ । यसैगरी चमेरोले जुठो हालेको फलफूल प्रयोग गरेमा, संक्रमित व्यक्तिको रगत दिशा पिसाबसँग प्रत्यक्ष सम्पर्कमा आएमा पनि यो भाइरस सजिलै सर्ने गर्छ । र यो अत्यन्त प्राणघातक हुने बताइएको छ।

लक्षणहरु:
ज्वरो आउने
टाउको दुख्ने
रिंगटा लाग्ने
मांसपेशी दुख्ने
वाकवाकी लाग्ने
श्वासप्रश्वासमा समस्या हुने
टन्सिलाइटिस
वेहोस भएर लड्ने
मष्तिष्कमा असर गर्ने

रोकथाम कसरी गर्ने त :
फलफूल राम्रोसँग पखालेर मात्रै खाने
तरकारी सकेसम्म पकाएर खाने
गाइवस्तुको गोठ र फार्म सफा राख्ने
मासु काट्दा र पकाउँदा पन्जा र मास्कको प्रयोग गर्ने
सकेसम्म पानी उमालेर खाने
बेलाबेलामा साबुनपानीले हात धुने

भारतमा संक्रमण फैलाउने चमेरो नेपालमा पनि पाइने त्यसैगरी नेपालमा सुँगुरपालन कृषकको रोजाइमा परेको व्यवसाय रहेको र मानिसबाट मानिसमा सजिलै सर्न सक्ने हुँदा नेपाल जोखिममा रहेको विज्ञहरु बताउँछन्। नेपालमा भाइरस आउन सक्ने सम्भावना भएका ठाउँमा अहिल्यै नै सतर्कता अपनाउनुपर्ने उनीहरुको भनाई छ ।