हेल्थ टिभी अनलाइन \काठमाडौं : कोरोना छ भनेर त्रसित भएर वा लापरवाही गरेर बालबालिकालाई नियमित रुपमा दिइने खोपहरु छुटाउन नहुने स्वास्थ्य तथा जनसंख्या मन्त्रालयले जनाएको छ ।

मन्त्रालयले एक सूचना जारी गर्दै कोरोना महामारीकै बेलामा पनि बालबालिकालाई धेरै रोगहरुबाट बच्न सहयोग गर्ने खोपहरु लगाउन छुटाउन नहुने जनाएको हो ।
मन्त्रालयले १५ महिना मुनिका बालबालिकालाई विभिन्न रोग विरुद्धका नियमित खोप लगाउनका लागि सबैलाई अनुरोध समेत गरेको छ। महामारीका बेला भनेर बालबालिकाको नियमित खोप छुटाउँदा उनीहरुमा विभिन्न संक्रामक रोगको संक्रमण, मृत्युदर र अपांगता हुने दर बढ्ने हुनाले बालबालिकाको उमेर अनुसारको खोप लगाउनुपर्नेमा मन्त्रालयले जोड दिएको हो ।

बालबालिकाको क्षेत्रमा काम गर्ने विभिन्न राष्ट्रिय तथा अन्तराष्ट्रिय संस्थाहरुले पनि अहिले नियमित खोप लगाउन छुटेका बालबालिकामा भोलिका दिनमा ठूलो समस्या देखिनसक्ने र अहिलेसम्म बाल स्वास्थ्यमा हासिल गरेको सफलतामा ह्रास आउनसक्ने भन्दै चिन्ता व्यक्त गर्दै आएका छन्।