हेल्थ टिभी अनलाइन \काठमाडौं : भारतमा हालसम्म ६५ करोडभन्दा बढी व्यक्तिले कोरोना विरुद्धको खोप लगाइसकेका छन्। त्यहाँ गत जनवरीदेखि खोप लगाउन सुरु भएको थियो । प्रत्येक दिन बढी भन्दा बढी खोप लगाउने देशमा भारत नम्बर १ मा पर्न आउँछ ।

भारतीय स्वास्थ्य मन्त्रालयका अनुसार गत २४ घण्टामा भारतमा १ करोड ९ लाख जनालाई कोरोना विरुद्धको खोप दिइएको छ । यो आफैमा निकै ठूलो संख्या रहेको पनि मन्त्रालयले जनाएको छ ।

औषतमा भारतमा प्रत्येक दिन ७४ लाखभन्दा बढीलाई खोप दिन काम भइरहेको जनाइएको छ । ११४ दिनमा १७ करोड मानिसलाई कोरोना विरुद्धको खोप दिएर भारतले रेकर्ड राखेको स्वास्थ्यका अधिकारीहरु बताउँछन्। भारत खोप लगाउने मामिलामा विश्वमै नम्बर १ मा पर्न आउँछ । त्यसपछि दोस्रो नम्बरमा ब्राजिल रहेको छ ।

भारतमा हालसम्म ३ करोड २८ लाख १० हजार ८९२ जनामा कोरोना संक्रमण पुष्टि भएको छ भने ४ लाख ३९ हजार ५४ जनाको कोरोना संक्रमणबाट मृत्यु भएको छ ।