हेल्थ टिभी अनलाइन \काठमाडौं : तिलगंगा आँखा प्रतिष्ठानमा आँखा सेवा विस्तार हुने भएको छ । कोभिड -१९ को महामारी यथावतै रहेको अवस्थामा सेवाग्राहीको चापलाई व्यवस्थित गर्न र साँझसम्म सहज रुपमा सेवा प्रदान गर्ने उद्धेश्यले प्रतिष्ठानमा भदौ १६ गतेदेखि विस्तारित सेवा प्रारम्भ हुन लागेको हो ।

हाल बिहान ८ बजेदेखि दिउँसो ३ः३० सम्म मात्र नियमित सेवा प्रदान गरिरहेको प्रतिष्ठानले भदौ १६ गते देखि भने साँझ ६ः३० बजेसम्म आँखा सेवा स्वास्थ्य प्रदान गर्ने जनाएको छ । कार्यालय समय भित्र आँखा उपचारका लागि समय मिलाउन अप्ठ्यारो भएका र व्यस्तताको कारणले बिहान तथा दिउँसो उपचार सेवा लिन नसक्नेहरुलाई मध्यनजर गर्दै विस्तारित सेवा शुरु गर्न लागिएको जनाइएको छ । अब देखि नियमित सेवा र प्रिमियम सेवा लिन चाहने सेवाग्राहीहरुले ८ बजेदेखि २ बजेसम्म नाम दर्ता गर्न सक्नेछन् भने विस्तारित सेवा लिन चाहने सेवाग्राहीहरुले दिउँसो ३ बजेदेखि साँझ ६ बजेसम्म नाम दर्ता गरी सेवा लिन सक्नेछन् ।

साथै प्रतिष्ठानले विगत ६ महिनादेखि प्रिमियम सेवा पनि संचालन गरिरहेको छ । प्रिमियम आँखा उपचार सेवामा सहज तथा छिटो, लामो लाईन बस्न नपर्ने, सबै विशेषज्ञ डाक्टरहरु एकै ठाउँमा हुने जस्ता सुविधाहरु रहेका छन् । बिहान ८ः३० देखि दिउँसो ३ बजे भित्र सेवाग्राहीले यो सेवा लिन सक्नेछन् ।