हेल्थ टिभी अनलाइन \काठमाडौं : कोरोना संक्रमण रोकथाम तथा नियन्त्रणका लागि लाग्दै आएको निषेधाज्ञा फेरि एक साता थप गरिएको छ । अब भदौ १६ गते रातीसम्म निषेधाज्ञा रहनेछ ।

आज बसेको काठमाडौं, भक्तपुर र ललितपुरका प्रमुख जिल्ला अधिकारीहरुको बैठकले अहिले भइरहेको निषेधाज्ञा भदौ १६ गतेसम्म थप गर्ने निर्णय गरेको हो । यसैगरी यसभन्दा अघिको बैठकको निर्णयले राती ८ बजेपछि सवारीसाधन चलाउन निषेध गरेकोमा यसपटक थप गरिएको निषेधाज्ञामा सो नियम हटाइएको छ ।

पछिल्लोपटक थप गरिएको निषेधाज्ञाको समय आज राती सकिँदै थियो। सरकारले कोरोना नियन्त्रण र रोकथामका लागि भन्दै गत वैशाख १६ गतेदेखि निषेधाज्ञा जारी गर्दै आएको छ । यसपटक पनि सबै प्रकारका सभा, सम्मेलन, गोष्ठी, भेला गर्न रोक लगाइएको छ । आदेश अनुसार सपिङ मल, सिनेमा हल, सैलुन आदि सञ्चालनमा पनि रोक लगाइएको छ ।

विवाह, व्रतबन्ध, सभा सम्मेलनको हकमा भने जनस्वास्थ्यका मापदण्ड पालना गरी बढीमा २५ जना सम्म सरिक हुन पाइने छ ।