हेल्थ टिभी अनलाइन\ काठमाडौं : काठमाडौंमा आजदेखि ५० वर्ष माथिका सबैलाई कोरोना विरुद्धको भेरोसेल खोपको पहिलो मात्रा लगाइने भएको छ ।

स्वास्थ्य कार्यालय काठमाडौंका अनुसार यसअघि खोप लगाउन छुटेका ५० वर्ष माथिका सबैलाई कोरोना विरुद्धको खोपको पहिलो मात्रा दिइने भएको हो । त्यसका लागि ३२ वटा वडा कार्यालयका खोप केन्द्रमा गएर खोप लगाउन सकिनेछ ।

यसका साथै विद्यालयका शिक्षक तथा विश्व विद्यालयका प्राध्यापकहरुलाई पनि यो खोप दिइनेछ । उता यसअघि खोप लगाउन छुटेका अत्यावश्यक सेवाका कर्मचारीलाई पनि यसअपटकको अभियानमा खोप दिइने भएको हो । खोप अनिवार्य गरेका देशमा जाने  नेपाली नागरिकलाई पनि खोप दिइने स्वास्थ्य कार्यालय काठमाडौंका प्रमुख बद्री खड्काले जनाए ।

खोप बिहान १० बजेदेखि ५ बजेसम्म चल्नेछ । खोप लगाउनका लागि आफनो उमेर खुल्ने परिचय पत्र लिएर जानुपर्नेछ । अन्यको हकमा आफू कार्यरत संस्थाले दिएको फोटो सहितको परिचप पत्र भए पुग्छ भने विदेश जानेको हकमा पासपोर्ट र भिसा देखाउनुपर्नेछ ।