हेल्थ टिभी अनलाइन\ काठमाडौं : अमेरिकाले सहयोग स्वरुप दिएको कोरोना विरुद्धको ‘जोन्सन एण्ड जोन्सन’ खोप काठमाडौंमा साउन ४ गतेदेखि लगाउन सुरु गरिने भएको छ । स्वास्थ्य तथा जनसंख्या मन्त्रालयको असार २८ गते बसेको बैठकको निर्णय अनुसार ५० देखि ५४ वर्ष समूहका नागरिकलाई  साउन ४ देखि ६ गतेसम्म जोन्सन एण्ड जोन्सन खोप दिन लागिएको हो ।

यो एक डोज मात्र दिए पुग्ने बताइएको छ । अमेरिकाबाट सोमबार जोन्सन एन्ड जोन्सनको १५ लाख ३४ हजार ८५० डोज खोप नेपाल आइपुगेको हो ।

यसैगरी अपांगता भएका व्यक्ति, नेपालमा बसोबास गर्दै आएका शरणार्थी, र यसअघि खोप लगाउन छुटेको स्वास्थ्यकर्मी र सुफाइकर्मीलाई पनि खोप दिने निर्णय भएको मन्त्रालयले जनाएको छ । खोपका लागि ४४ वटा केन्द्र तोकिएका छन्।

आजबाट ५५ वर्षमाथिका उमेर समूहलाई भेरोसेल खोप पनि दिन सुरु गरिएको छ। त्यही केन्द्रबाट नै जोन्सन एण्ड जोन्सन खोप दिइनेछ ।

उपत्यकाबाहिरको हकमा भने खोप केन्द्रहरुमा खोप पुगे लगत्तै सुरु गरिने मन्त्रालयले जनाएको छ ।