हेल्थ टिभी अनलाइन \काठमाडौं : नेपालमा कोरोना भाइरस विरुद्धको खोपको पहिलोे डोज लिनेको संख्या २६ लाख नाघेको छ ।

स्वास्थ्य तथा जनसंख्या मन्त्रालयका अनुसार हिजोसम्म कोरोना विरुद्धको पहिलो डोज खोप लगाउनेको संख्या २६ लाख ११ हजार ८०७ पुगेको छ । यसैगरी दुबै डोज लिनेको संख्या १० लाख ४१ हजार ३६६ पुगेको मन्त्रालयले जनाएको छ । नेपालमा गत माघ १४ गतेदेखि कोरोना विरुद्धको खोप दिन शुरु गरिएको हो । त्यसयता विभिन्न चरणमा खोप अभियान चलाइएको छ ।

हालसम्म चीन र भारतले सहयोग स्वरुप दिएको र खरिद गरिएको कोभिशिल्ड र भेरोसेल खोप नागरिकलाई लगाइएको छ । मन्त्रालयका अनुसार आज मात्रै नेपालमा अमेरिकाबाट १५ लाख डोज जोनसोन एण्ड जोनसोन को खोप आउने भएको छ । यो खोप आएपछि नेपालमा तीन प्रकारका खोपको प्रयोग हुने भएको छ । सरकारले चीन सरकारसँग नन डिस्क्लोजर सम्झौता गरेर ४० लाख डोज खरिद गरेको छ । जस अनुसार पहिलो खेपमा ८ लाख डोज आइसकेको छ भने अरु भने आउने क्रममा रहेको छ ।

प्रधानमन्त्री केपी शर्मा ओलीले आगामी डिसेम्बरसम्ममा सबै लक्षित समूहलाई कोरोना विरुद्धको खोप दिइने बताउँदै आएका छन्।