हेल्थ टिभी अनलाइन \काठमाडौं : नेपालका लागि अष्ट्रेलियाली राजदुत फेलीसिटी वोल्कले करिब  ४१ लाख मूल्य बराबरको दुई स्वास्थ्य उपकरणहरु त्रिभुवन विश्वबिद्यालय चिकित्साशास्त्र अध्ययन संस्थानका डिन प्रा डा दिव्या सिंह शाह र त्रिवि शिक्षण अस्पताल फरेन्सिक बिभागका डा समारिका दाहाललाई हस्तान्तरण गरेकी छिन्।

अष्ट्रेलिया अवार्डस् अल्मुनाई ग्राण्टबाट दुई जना अष्ट्रेलियाली विश्वविद्यालयहरुका अल्मुनाई – प्राडा शाह र डा दाहाललाई उनीहरुको कार्यमा थप सहयोग गर्न अल्ट्रासाउन्ड मेसिन र पोर्टेवल डेन्टल एक्सरे मेसिन प्रदान गरिएको हो ।

डेण्टल एक्सरे मेसिन त्रिवि शिक्षण अस्पतालको फरेन्सिक मेडिसिन बिभागमा बिपद् पीडित ब्यक्तिहरुको पहिचान गर्ने कामलाई बिस्तार गर्न प्रयोग गरिने छ । डा दाहाल डेण्टल एक्सरेबाट पहिचान गर्ने बिधामा नेपालको पहिलो ब्यक्ति हुन् र चिकित्सा पेसाप्रतिको प्रतिवद्धता, नेपालमा स्वास्थ्य सेवामा उनको योगदान र अष्ट्रेलिया अवार्डस् महिला नेतृत्व संजाल नेपालमामा उनको सकृय सहभागिताको कदर स्वरुप प्रदान गरिएको हो । आईओएमका डिन प्राडा शाहमार्फत प्रदान गरिएको अल्ट्रासाउण्ड मेसिन डा शाहको मृगौला रोग र अंगप्रत्यारोपण क्षेत्रमा योगदानको लागि प्रदान गरिएको हो ।

उक्त उपकरणहरु हस्तान्तरण गर्दै राजदुत वोल्कले भनिन्, ‘अष्ट्रेलिया सरकारको नेपाल कोभिड १९ विकास सहयोग योजना अनुसार नेपालको स्वस्थ्य सुरक्षाको क्षेत्रमा सहयोग गर्न प्रतिबद्ध रहेको छ । यो योजनाले नेपालले समानान्तर रुपमा झेलिरहेका विभिन्न प्रकारका चुनौतिहरु र अति जोखिममा रहेका समुदयलाई सहयोग केन्द्रित गर्नेछ । विगत केहि महिना देखि स्वास्थ्य प्रणालीहरु धेरै दवाव देखिएको छ र नेपालको स्वास्थ्य सेवाको क्षेत्रमा कार्यरत स्वास्थ्यकर्मीहरु लाई परेको जटीलता र तनावको म कल्पना मात्र गर्न सक्छु । मलाई आशा छ अष्ट्रेलिया अवार्डस् अल्मुनाई ग्राण्टबाट प्राप्त यो सहयोगले नेपालको स्वस्थ्य प्रणालीमा सहयोग गर्नेछ र दशकौं देखि नेपाल र अष्ट्रेलियाले एकआपसमा गरेको मित्रवत सहयोगको सम्झना गराउनेछ ।’